L'onn passà ha la SRG/SSR reducì ses gudogn per 20 milliuns – da 48,7 milliuns sin 27,6 milliuns francs. In'influenza positiva sin il resultat hajan gì ils gieus olimpics a Peking ed il campiunadi mundial da ballape en il Qatar. Tenor atgnas indicaziuns hajan las mesiras da spargn ch'èn vegnidas introducidas il 2018, las entradas da reclama da tals eveniments da sport gronds e quotas d'aspectaturs solidas tar ils chanals da televisiun stabilisà la situaziun finanziala da la SRG/SSR.
Quotas stabilas
La quota da participaziun al martgà è restada stabila l'onn passà. Tar ils emetturs da televisiun da SRF è la quota dal martgà sa reducida l’onn 2022 en cumparegliaziun cun l’onn precedent per 0,1 puncts procentuals sin 33,4%. Er la recepziun da las purschidas online èn restadas stabilas tenor la communicaziun. Il servetsch online internaziunal Swissinfo (SWI) ha redublà durant la pandemia ses dumber annual da visitaders sin la pagina d’internet da 35 sin 70 milliuns ed ha pudì tegnair 63 milliuns da quels er l’onn 2022. En general saja er la fidanza en la SRG/SSR restada sin in aut nivel.
Crisas han influenza negativa
Pervi da la crisa d'energia – chaschunada entras la guerra en l'Ucraina – quinta l'interpresa cun custs supplementars da milliuns che sa mussian probabel a partir dal 2024. Er la situaziun sin ils martgads da las finanzas haja in'influenza negativa, uschia per exempel per la cassa da pensiun.
