Enfin il 2022 vegnan 211 plazzas stritgadas. Il medem mument vegnian dentant 95 novas plazzas da lavur creadas, sco la directura da SRF, Nathalie Wappler ha annunzià. SRF quinta da stuair relaschar 120 persunas. Las ulteriuras plazzas vegnian stritgadas entras la fluctuaziun normala e pensiunaments anticipads. En pli duain var 100 persunas vegnir rescoladas.
Reducziun da purschida
Ultra da quai ha SRF annunzià da reducir sia purschida. Tranter auter vegnia l’emissiun da televisiun «Mini Schwiiz, dini Schwiiz» remplazzada cun auters formats sumegliants. Er sa midar duai la purschida da litteratura sin SRF 2. L'emissiun «52 beste Bücher» duai vegnir remplazzada cun ina nova purschida da litteratura. Cun las midadas da program vul la direcziun da SRF surtut stgaffir spazi per novas purschidas digitalas.
