Ils guardiachatscha da Glaruna dastgan sajettar il luf dominant dal triep da Kärpf. L'Uffizi federal d'ambient ha giuditgà il mastgel sco «animal genitur che chaschuna spezialmain gronds donns». La Confederaziun aveva gia lubì da sajettar dus luffins dal triep. Cun la nova decisiun dastga uss vegnir sajettà dasper il mastgel dominant be pli in luffin.
17-10-2023
Glaruna dastga sajettar dus luffins
Il glindesdi ha in cusseglier guvernativ ditg ch'i saja insupportabel da betg dastgar laschar sajettar ils lufs. Oz ha l'Uffizi federal d'ambient dà la lubientscha per sajettar en tut trais luffins.
La notg sin dumengia èn vegnids attatgads en il Sernftal sper Elm en il chantun Glaruna 20 alpacas. Tar quella èn vegnids mazzads set animals e dus ulteriurs èn vegnids blessads. Dal triep da Kärpf dastga il chantun perquai sajettar dus da tschintg luffins. Plinavant dastga il chantun sajettar in luffin dal triep da Schilt. Ina lubientscha d'er sajettar il bab luf dal triep da Kärpf è anc tar l'Uffizi federal d'ambient.
Il glindesdi èn analisas da DNA anc pendentas, ma il chantun Glaruna ha supponì ch'il triep da Kärpf saja responsabel per l'attatga. Gia la fin d' avust ha il triep stgarpà in vadè sin in'alp da Glaruna. Suenter ha il chantun inoltrà a la confederaziun ina dumonda per regular la generaziun giuvna. Envers SRF di il cusseglier guvernativ da Glaruna Kaspar Becker, ch'i saja insupportabel ch'ins na dastgia betg regular ils lufs.
In'ulteriura dumonda per regular ha il chantun tschentà per regular il segund triep en il chantun, il triep da Schilt. Quel ha stgarpà en il settember sin l'alp da Mürtschen nov nursas.