In supplement da renta duai cumpensar la tariffa da conversiun che vegn sbassada da 6,8% sin 6%. Suenter il Cussegl dals chantuns ha er il Cussegl naziunal decidì che las 15 annadas da la generaziun transitorica survegnian per vita duranta in supplement da renta sin il provediment professiunal. Profitar duai dentant mo circa la mesadad dals nov-pensiunads. Persunas cun in'auta renta na vegnan betg sustegnidas supplementarmain.
Deducziun procentuala enstagl fixa
Omaduas chombras èn da l'avis che la deducziun da coordinaziun na duai betg pli esser fixa mabain procentuala. I duai adina esser assicurà 80% da la paja. Quai dettia ina dinamica en la segunda pitga perquai che lavur parziala ed era entradas bassas vegnan assicuradas raschunaivel. Betg d'accord èn ils cussegls tar la dimensiun da la deducziun. Il Cussegl dals chantuns vul ina deducziun da 15%, il Cussegl naziunal 20%.
La proxima runda
Damai che pliras differenzas restan, va la fatschenta enavos tar il Cussegl dals chantuns. Per exempel vai per la barriera d'entrada, che decida per tgi ch'igl è da manar ina cassa da pensiun. Il Cussegl dals chantuns vegn a tractar la fatschenta la gievgia.
