Persunas che fadian pauc e persunas ch'han pliras plazzas u patruns duain il futur pudair pajar en pli simpel ed pli bler en la cassa da pensiun. Nov na duain betg pli vegnir tratgs giu da la paja ina deducziun da coordinaziun da fix 25’100 francs mabain 15% da la paja suttamessa a l’AVS. Ussa chaschuna quella deducziun auta che persunas emploiadas cun pajas bassas e talas che possedan plirs patruns ch’ellas na pon betg u mo per ina pitschna part sa segirar en la cassa da pensiun. Cunquai retschaivan ellas cura ch’ellas van en pensiun mo ina renta d’AVS u mo ina pitschna renta da la cassa da pensiun. Savens èn quai dunnas che lavuran a temp parzial.
Anc betg decidì cumpensaziun
Anc betg decidì ha il Cussegl dals chantuns tgi e quant fitg che las annadas che van en pensiun curt suenter che la refurma va en vigur duain survegnir sco sustegn. Pervia da la reducziun da la tariffa da conversiun dad oz 6,8 sin 6% survegnan quellas annadas pli pauca renta e n'han er betg la pussaivladad da cumpensar quella largia cun pajar en dapli. Quatter propostas èn sin maisa che custan tranter 9 e 30 milliardas francs.
Il Cussegl dals chantuns vul anc terminar la debatta en questa sessiun.
