Sin l’entir mund sa tschenta mintg’onn dapli ch’ina milliarda tonnas vivonda en il rument. Quai mussa in nov studi «Food Waste Index Rapport» or da l'USA. Ils pli gronds sfarlattaders èn las chasadas.
L'onn 2022 han chasas privatas tenor il rapport sfarlattà totalmain 631 milliuns tonnas vivonda. Quai correspunda a 60% dal foodwaste global.
Cuira: Ina frestgera publica duai gidar
«Madame frigo» è ina frestgera publica en la Ringstrasse 13 tar la IBC a Cuira. Mintgin e mintgina po deponer tschertas vivondas en la frestgera e sa servir dals products deponids.
Tgirada vegn ella d'ina pitschna gruppa da voluntarias. La finamira da «Madame Frigo» è da salvar vivondas dal rument. Per exempel sch'ins ha cumprà en memia bler mangiativas, ina frestgera plaina avant las vacanzas u restanzas dad ina festa gronda.