Cuira - La frestgera publica da Madame Frigo salva mangiativas

Mintgina e mintgin po deponer u prender ora mangiativas da las frestgeras publicas da Madame Frigo. Quellas vegnan tgiradas da voluntarias e voluntaris, ed i dat en il fratemp passa 130 frestgeras publicas en l'entira Svizra. Uschia vegnan mintg'onn salvadas passa 200 tonnas mangiativas dal sfarlattim. Sper in lieu a Schiers, datti en la regiun dal Grischun dapi passa in onn er ina frestgera da Madame Frigo a Cuira.

La stgaffa melna cun l'inscripziun Madame Frigo stat a Cuira gist sper ina chasa a la Planaterrastrasse 11, ed en questa stgaffa sa chatta ina frestgera ch'è adina accessibla. Avant var in onn ha Livia Tanner manà questa purschida ensemen cun ulteriurs voluntaris a Cuira. A l'entschatta era la frestgera en il territori da Cuira Vest. Ma cunquai che questa regiun era pauc frequentada, ha il team da voluntaris midà l'ultima stad la plazza da la frestgera en la pli populada citad veglia. Tras quai datti ussa in barat pli stedi da mangiativas en la frestgera. Ed i na resta era strusch insatge da mangiar danvanz, che vegniss lura mal e stuess vegnir dismess. Entant s'occupan sis voluntaris cun la tgira da la frestgera. Latiers tutga da nettegiar ella, e da controllar ses cuntegn sin mangiativas betg lubidas.

Ils voluntaris a Cuira collavuran dapi curt cun l'organisaziun per salvar mangiativas Maisa magica (Tischlein deck dich), che rimna victualias che na pon betg pli vegnir vendidas e che repartan quellas a persunas pertutgadas da povradad. Ina pitschna part da quellas mangiativas vegn ussa era deponida en la frestgera da Madame Frigo a Cuira. Uschia daventia lur purschida pli attractiva per visitaders e visitadras, ed ultra da quai vegnia gidà anc dapli a salvar victualias. Er èn ils organisaturs il mument a la tschertga d'in fin dus lieus per ulteriuras frestgeras a Cuira, per pudair porscher uschia anc dapli pussaivladads da parter victualias, empè da bittar ellas davent.