La Confederaziun ha mess en vigur ils pajaments directs il prim da zercladur 1993, quai tranter auter per dar impuls per ina agricultura pli ecologica. Mintg'onn dat la Confederaziun radund 2,8 milliardas francs sustegn a l'agricultura en furma dals pajaments directs.
Suenter 30 onns sa mussian las limitas dal sistem, scriva l'Uffizi federal d'agricultura. Quel saja vegnì fitg cumplex perquai ch'ins haja adina puspè bajegiar ora el. Plinavant sa mussia, che finamiras da la societad, oravant quellas en l'ecologia, na possian betg vegnir ademplidas mo cun sustegns finanzials e mo en l'agricultura.
Il Cussegl federal vul perquai includer tut ils participants da la chadaina da victualias en la politica d'agricultura futura – e vul uschia sviluppar vinavant ils pajaments directs.
Populaziun svizra preferescha products indigens
Svizzers e Svizras prefereschan tar blers products agriculs quels che vegnan producids en Svizra. Quai vala oravant tut per ovs (77%), latg e products da latg frestg (65%), sco era tar charn e tartuffels (mintgamai 58%).
L'institut da perscrutaziun dal martgà Demoscope ha fatg ina retschertga represchentativa pertutgant la moda da cumprar en da la populaziun svizra. Motiv principal per la decisiun per products svizzers saja la curta via da transport, da sustegnair l'agricultura indigena e l'auta qualitad dals products.
L'emprima giada sustegn per soja
Il 2022 è oravant tut la producziun da soja s'augmentada fermamain en Svizra. La surfatscha da producziun è s'augmentada per radund 30%, cumpareglià cun l'onn 2021 e munta uss a radund 2'900 hectaras. Cumpareglià cun l'entira surfatscha agricula, da 1'042'014 hectaras, ina pitschna cumpart. Tenor il rapport da l'Uffizi federal d'agricultura è questa surfatscha dentant creschida en ils davos diesch onns per il traidubel e vegnia era vinavant a crescher.
Il medem onn hai era per l'emprima giada dà sustegn per singulas culturas da leguminosas sco fava ni lentiglias. Cun questas contribuziuns sustegna la Confederaziun la cultivaziun da quels legums e la midada da fritg.
