L'ETH Turitg è la meglra scola auta da l'Europa continentala, quai vul dir da l'Europa senza la Gronda Britannia. En la rangaziun mundiala dal magazin «Times Higher Education» è ella sin plazza 11. La Scola politecnica federala a Turitg ha gudagnà quatter plazs cumpareglià cun la rangaziun d'avant in onn.
En ils top 200 da l'entir mund sa chattan anc tschintg ulteriuras universitads svizras: l'ETH Losanna (rang 41), las universitads da Turitg (82), Berna (94), Basilea (101) e Losanna (135). Betg pli tranter las meglras 200 scolas autas figurescha l'universitad da Genevra.
Naginas midadas datti a la testa:
- Universitad dad Oxford (Gronda Britannia)
- Universitad da Harvard (Stadis Unids)
- Universitad da Cambridge (Gronda Britannia)
Las universitads vegnian cumparegliads en 13 categorias, tranter auter tar l'instrucziun u la perscrutaziun.