En plirs lieus da la Svizra franzosa han purs e puras envidà fieus da protesta sonda saira. Cun quai han els appellà a la solidaritad cun pretaisas da l'agricultura, p.ex. per pajas pli autas. Gia il venderdi hai dà protests a Kerzers en il chantun da Friburg.
Las acziuns da protesta paschaivlas «Feu de rassemblement» èn sa concentradas sin ils chantuns da Friburg, Vad e Genevra. Vitiers tar las pajas pli autas tutgian er ina meglra remuneraziun. Envers la populaziun datti l'appel da s'unir cun il moviment.
La notg avant eran sa radunadas bunamain milli persunas a Kerzers FR ad in protest da purs paschaivel. Las radunanzas han vulì drizzar in «clom da sa svegliar envers l'administraziun, a la politica ed als acturs dal martgà».
Clom via Facebook
Gia dapi in pèr emnas sa mobiliseschan surtut puras e purs da la Svizra franzosa per far attent sin lur pretaisas. L'appel en la Svizra romanda è vegnì lantschà d'in pur vadais sur ina gruppa da Facebook. Gia ils 12 da favrer aveva l'uniun purila svizra ed ulteriuras organisaziuns surdà ina petiziun suttascritta da 65'000 persunas cun pretensiuns per renconuscher dapli l'engaschament da l'agricultura a la Confederaziun ed a differents detaglists. En la petiziun vegn il Cussegl federal supplitgà da betg spargnar sin donn e custs dals purs.
Ils protests da purs èn stads per part vehements en la Frantscha, han dentant era gì lieu en la Germania, ed anc pli baud en l'Ollanda. Er en il Grischun datti per part simbols e segns da solidaritad cun ils protests, per exempel han persunas nunenconuschentas vulvì la tavla dal lieu a Tersnaus, e pendì in singul stival vi d'ella, tge che vala so segn dals protests.
