Las mirveglias per la sexualitad èn dal tuttafatg normalas e fan part dal daventar creschì. Tge che vegniva fatg pli baud da magazins sco «BRAVO» capita pli e pli online. L'internet para d'esser tant per mattas, sco er per mats ina funtauna impurtanta per l'atgna educaziun sexuala. Entras quai pon las mirveglias natiralas dentant er daventar in risico.
Uffants pon ozendi vegnir gia fitg baud en contact cun pornografia, quai conferma Corinne Rietmann. Ella è persuna dal fatg per sanadad sexuala tar il post spezialisà grischun Adebar e dat regularmain lecziuns d'educaziun sexuala en scolas grischunas.
Nus avain en las scolas gia uffants da la terza classa ch'èn stads en contact cun pornografia. Era grad tar ils buobs da la tschintg- e sisavla classa datti blers. Tscherts han simplamain ina giada gì contact e na chattan er betg grad uschia bel quai ed auters consumeschan gia detg activ.
Ozendi tanschan paucs clics per avair access ad in porno en l’internet. Era per uffants n'è l'access a cuntegns pornografics nagin striegn. Ils uffants sajan gia uschia sperts cun la tecnica ch'els sappian exact tge clics ch'els han da far per avair access – er sch'ils geniturs han installà mesiras da protecziun, per ch’ils uffants na vegnian betg sin tschertas paginas. Da chattar en l'internet èn tant cuntegns lubids, sco er spert chaussas scumandadas.
En Svizra vegn differenzià tranter pornografia lubida a partir da 16 onns e tala ch'è scumandada per ina e mintgina. La pornografia illegala cuntegna uffants, animals u violenza. Mintga persuna che posseda u parta tala pornografia illegala sa fa chastiabla.
Tge è lubì?
Tant pornografia legala sco er illegala na vegn betg mo consumada online, mabain er repartida tranter collegas. Ma far accessibel pornografia ad uffants e giuvenils sut 16 onns è adina scumandà – tuttina quant vegl ch'ins è ed en tge furma ch'ins dat vinavant ella.
Pascal Vetsch è policist tar il post da prevenziun da la polizia chantunala. El visita en sia funcziun er scolas per far lavur da prevenziun e manegia che minorens e minorennas na pon savens betg differenziar tge ch'è lubì e tge betg. Betg mo la distribuziun, per exempel via WhatsApp, da cuntegns pornografics a persunas sut 16 onns è scumandada, mabain er sch'ins mussa ils cuntegns per exempel sin la plazza da scola.
D'evitar dal tuttafatg ch'uffants vegnan en contact cun pornografia para damai grev. Tant Corinne Rietmann sco er Pascal Vetsch èn da l'opiniun ch'i saja fitg impurtant ch'ils geniturs discurran avertamain cun lur uffants sur da sexualitad e quai da pitschen ensi, mintgamai en la furma adattada a la vegliadetgna. Uschia pon ils uffants en il meglier cas metter a lieu las chaussas en cas ch'els vegnissan pli tard confruntads cun cuntegns pornografics. Plinavant saja d'avantatg da stgaffir ina communicaziun da fidanza, per che l'uffant n'ha naginas retegnientschas u tema da vegnir a raquintar tge ch’occupa el.
Igl è normal che geniturs mussan ad uffants pitschens las reglas en la sablunera ed il medem vala era per la «gronda sablunera» ch’è en quest cas l’internet.
Sex en in porno n’è betg il medem sco sex en realitad
Las collavuraturas dal post spezialisà Adebar observan ch'uffants ch'han nagina u pauca educaziun sexuala e pon betg discurrer cun insatgi sur da quai che fatschenta els en connex cun lur sexualitad, tschertgan pli savens las respostas a lur dumondas cun consumar pornografia.
Ed en tals cas è il privel grond, che l'uffant survegn in maletg sbaglià da sexualitad, sco per exempel ch'i na constat betg insatge cun l’agen corp perquai che quel na vesa betg or sco en ils videos, ch'i dovra en realitad in consens per avair sex u ch'i vegn sclerì ordavant la protecziun. Perquai èsi impurtant d’avair ina buna educaziun.
Quai è sco in film d'action che n'è er betg adina la realitad.
S'accorscher sco genitur sche l'uffant ha vis cuntegns pornografics, n'è betg adina simpel. Indizis pon esser ch'ils uffants dovran tuttenina pleds obscens u tematiseschan praticas ed autras tematicas che vegnan avant en pornos, dentant er ch'els na pon betg pli durmir, magliar u sa concentrar. En talas situaziuns èsi impurtant che geniturs reageschan e tschertgan sustegn professiunal, in tal porscha per exempel il post spezialisà Adebar.
