Sin l'entir mund saja in terz dals peschs d'aua dultscha periclità. Il WWF avertescha perquai d'ina muria da peschs e las consequenzas. Tenor in rapport da l'organisaziun da la protecziun d'ambient sajan 80 spezias da peschs d'aua dultscha gia extirpadas – 16 da quellas durant l'onn passà.
Tut en tut sa diminueschia la biodiversitad en flums e lais dubel uschè svelt sco en la mar u en ils guauds. Quai scriva il WWF ensemen cun ulteriuras 16 organisaziuns en ses rapport cun il num «The Worlds Forgotten Fishes».
La situaziun dals peschs è critica er en Svizra
En Svizra èn 58% dals peschs sin la glista cotschna. Gia svanids sajan ils scaruns, salmuns-litgiva, sturiuns atlantics e da la mar mediterrana, lampredas da flum, alosas, fintas ed ils salmuns dal Danubi, scriva il WWF.
Disturbads vegnan ils peschs en Svizra surtut da la construziun d'ovras idraulicas e la negligientscha da flums ed auals. Il WWF pretenda perquai ch'i vegnia uss investì en mesiras che pussibiliteschan la migraziun natirala dals peschs.