Nagin dastgia vegnir restrenschì en sia sfera privata ed autodeterminaziun pervi da la crisa da corona. Quai pretenda il pli aut protectur da datas da la Confederaziun, Adrian Lobsiger. Tut las intervenziuns stoppian restar commensuradas.
Lavurar da chasa anora, far cumissiuns online, l’app da covid-19 – las schanzas ed ils ristgs da l’internet èn anc pli actuals en la crisa da corona. En ses rapport annual punctuescha Lobsiger, quant impurtanta ch’ina politica da datas liberala saja.
Il «di suenter» stoppia la societad dentant puspè pudair decider sezza en fatgs digitals – e quai senza patir donns, scriva il protectur federal da datas. Per exempel speria el, ch’il daner contant sco med da pajar anonim, vegnia ad esser en diever era suenter la crisa.
Ils davos mais era Adrian Lobsiger cunzunt s’engascha per in bun svilup da l’app Swiss-covid. L’analisa da las datas da mobilitad da l’app succeda uss a moda anonima e decentrala.
