Sin fundament da la situaziun actuala cun las ospitalisaziuns che s’augmentan e la nova varianta omicron ha il Cussegl federal decis ch’el vul puspè introducir mesiras naziunalas per franar il virus.
Las suandantas propostas trametta il Cussegl federal en consultaziun. Ils chantuns, ils partenaris socials e las cumissiuns dal parlament, han temp enfin damaun la saira il 1. da december da dar in resun. Questas mesiras proponidas duain lura valair enfin ils 24 da schaner 2022.
Obligatori da certificat:
- Obligatori da certificat duai vegnir schlargià sin tuttas occurrenzas publicas che han lieu endadens sco er sin tuttas activitads sportivas e culturalas da laics ch'èn endadens. (Quai munta che l'excepziun per gruppas sut 30 persunas vegn abolida.)
- Er tar inscunters privats a partir dad 11 persunas duai valair in obligatori da certificat.
- Per occurrenzas ordadora duai valair il certificat a partir da 300 persunas (actual 1'000 persunas)
Obligatori da mascrina:
- En tuttas parts endadens dad instituziuns e manaschis publics cun in obligatori da certificats, inclusiv occurrenzas cun in obligatori da certificat, duai supplementarmain valair obligatori da purtar mascrina.
- En instituziuns nua ch'il purtar mascrina n'è betg pussaivel duai dar mesiras cumplementaras. Uschia duai dar per exempel en ustarias (u er discotecas ed en rom dad occurrenzas endadens) in obligatori da seser, là nua ch'i vegn consumà.
Mesiras a la plazza da lavur:
Per reducir ils contacts a la plazza da lavur e per reducir il dumber da persunas en il traffic public propona il Cussegl federal trais variantas:
- Varianta 1: Obligatori da mascrina en tuttas stanzas nua ch'i ha dapli ch'ina persuna.
- Varianta 2: In obligatori da far homeoffice per collavuraturas e collavuraturs che n'èn betg vaccinads u guarids. Sche quai n'è betg pussaivel vala per quellas persunas in obligatori da purtar mascrina.
- Varianta 3: In obligatori da homeoffice general. Sche quai n'è betg pussaivel vala in obligatori da mascrina en tuttas stanzas nua ch'i ha dapli ch'ina persuna. Plinavant duain manaschis vegnids obligads da porscher tests per collavuraturas e collavuraturs.
Tests regulars en scolas:
Tuttas scolas dals stgalims obligatoris e dal stgalim secundar II duain vegnir obligads da testar regularmain.
Durada da valaivladad dals certificats vegn restrenschida
- Ils tests da corona da PCR na duain betg pli esser valaivels per 72 uras mabain be pli per 48 uras
- Ils tests d'antigen na duain betg pli valair per 48 uras mabain be pli per 24 uras
Nagina limita da capacitads pli
Suenter l'emna da vaccinar parta il Cussegl federal dal fatg che tuttas persunas che vulan sa laschar vaccinar, han er pudì far quai. Perquai na saja betg pli giustifitgà dad anc limitar capacitads endadens.
Finamira resta in enviern senza serradas e triaschas
Sco il minister da sanadad Alain Berset ha declerà a la conferenza da pressa stoppian ins reagir svelt sin la situaziun nova ch'è sa sviluppada dapi l'emna passada. «Nus vulain in enviern senza serradas e senza ch'il sistem da sanadad vegnia surdumandà», ha ditg Berset. Perquai dovria uss mesiras naziunalas. La unda da delta e la nova varianta omicron pretendian ch'ins reageschia.
Sco il president da la Confederaziun Guy Parmelin ha declerà saja nagina opziun pli da betg vegnir cun mesiras naziunalas. Il Cussegl federal saja pertschert che tuts sajan stanclentads da la situaziun. Tuttina saja impurtant che tuts e tuttas sajan pertschertas da lur responsabladad. El ha ina giada dapli accentuà l'impurtanza da laschar vaccinar cun la terza dosa. Quai saja in punct central per franar la pandemia.
