La finamira saja d'augmentar la capacitad da testar en vista a l'enviern che stat avant porta, communitgescha la direcziun da sanadad turitgaisa.
En la situaziun actuala èsi impurtant ch'er persunas cun levs sintoms vegnan testadas uschè spert sco pussaivel.
I saja previsibel ch'anc dapli persunas veglian sa laschar testar pervi da sintoms da grippa u da sfradurs. La gruppa en mira per quests tests èn en emprima lingia persunas cun levs sintoms u er viagiaturs. Il test vegn fatg sin annunzia, l’analisa en in labor extern. Per far ils tests da PCR cun in sfrusch vi dal nas e la gula dovra il persunal da l’apoteca ina scolaziun supplementara.
Persunas che sa laschan testar en apotecas ston per regla be pajar sezzas ina pitschna part dal test, per il solit 50 francs. Sch’ellas adempleschan ils criteris da test da la Confederaziun, surpiglia quella il rest dals custs.
Grischun vul anc spetgar
Da far pussaivel ils tests da corona era en apotecas saja da principi ina buna chaussa, ha il chantun Grischun scrit sin dumonda da RTR. Perquai ch’i manchia la basa legala na saja il mument dentant betg pussaivel da far quai. I dovria ina lubientscha da Swissmedic, l’Institut svizzer per products terapeutics.
Il chantun observa dentant ils projects da pilot a Turitg ed a Schaffusa e sch’igl è pli tard pussaivel d’integrar las apotecas en la strategia chantunala, vulan ins examinar la realisaziun en il Grischun.