La prognosa dal svilup da la populaziun mussa in creschament en la Svizra. Il Grischun crescha bain anc ils proxims onns – ma la populaziun vegnia a stagnar suenter il 2043, scriva l'Uffizi per economia e turissem dal Grischun. Ed ils onns suenter, fin il 2055 duess la populaziun grischuna perfin sa reducir. Raschuns principalas èn il surpli da mortoris en relaziun cun las naschientschas, e las midadas spetgadas tar ils moviments da migraziun.
Concentraziun enturn las aglomeraziuns grondas
En ils proxims trais decennis crescha la populaziun tenor il scenari calculà en ils chantuns Lucerna, Son Gagl, Vad, Genevra, Turgovia ed Argovia per passa 20%. La media dals chantuns vegn ad importar var 16 %. Consequentamain vegn la populaziun da la Svizra er vinavant a sa concentrar sin l'intschess da l'aglomeraziun da Turitg e dal Lai da Genevra. En ils chantuns Giura, Neuchâtel, Schaffusa ed Appenzell Dadora vegn la populaziun a sminuir (damain 2% fin l'onn 2055).
Dapli populaziun activa ma er dapli persunas attempadas
La populaziun che lavura vegn a crescher tranter 2024 e 2055 per 12,5% ed a muntar a var 5,8 da totalmain 10,5 milliuns abitantas ed abitants.
Sper ina cumpart pli gronda da persunas ch'èn activas en il mund da lavur, crescha er la cumpart da la populaziun sur 65 onns. L'onn 2024 devi sin 100 persunas cun activitad da gudogn (da 20 fin 64 onns) 38 persunas sur 65 onns. Tenor ils trais scenaris pussaivels vegn quest dumber a s'augmentar fin l'onn 2055 sin passa 50 persunas (51 tenor il scenari da referenza; 50 tenor il scenari «aut»; 52 tenor il scenari «bass»).
Dapli persunas cun diplom sin stgalim terziar
Il nivel da furmaziun da la populaziun svizra vegn probablamain a s'augmentar marcantamain ils proxims onns. Tenor il scenari da referenza vegnan l'onn 2028 passa 50% da las persunas tranter 25 e 64 onns ad avair terminà ina scolaziun terziara (furmaziun professiunala superiura e scolas autas). Fin l'onn 2045 vegn questa part a crescher sin 62%.
