Las quotas d'aua restanta che valan per las ovras idraulicas en Svizra vegnan messas en dumonda. La debatta en il parlament a Berna haja gia cumenzà, scriva la «NZZ da la dumengia». In'allianza burgheisa veglia impedir che las ovras idraulicas produceschien bia pli pauca forz'electrica ils onns vegnints, perquai ch’ellas ston laschar ir atras dapli aua senza nizzegiar ella – uschenumnada «aua restanta».
Questa discussiun ston ins dastgar far.
La problematica da laschar aua restanta senza niz economic saja da discutar, di il president dall'autoritad da regulaziun da la forz'electrica Elcom Werner Luginbühl. E Mario Cavigelli, cusseglier guvernativ e president dals directurs e directuras chantunalas d'energia di, ch'i stoppia esser pussaivel da manar quella discussiun.
Critica vegn da las uniuns da l'ambient e da la federaziun da pestgadras e pestgaders. Ins haja suttascrit il december a la maisa radunda federala iniziada da la cussegliera federala Simonetta Sommaruga ina decleraziun da respectar las mesiras da protecziun existentas.
