En Svizra vegn adina dapli glieud pli veglia confruntada cun engions. Tenor in studi da la Pro Senectute han prest 80% da tut la glieud sur 55 gì da far cun emprovas da cugliunaria ils ultims onns. Tar las cugliunarias tutga uschenumnà phishing en l'internet, ma er emprovas da cugliunar cun il telefon. Surtut telefons da schoc sajan derasadas en il mument, tar quels pretendan cugliunaders d'esser medis e dumondan daners per in'operaziun urgenta per confamigliars.
La Pro Senectute stima ch'ils donns muntian mintg'onn radund 675 milliuns francs. Cumpareglià cun il studi d'avant tschintg onns saja quai in augment dad in terz. Lura aveva la summa da donn anc muntà enturn 400 milliuns francs. Cun ina campagna da prevenziun naziunala vulan la Confederaziun e la polizia ussa sensibilisar pli fitg la populaziun.
