Temas èn tranter auter il provediment d’electricitad, l’export d'armas e la refurma da la prevenziun per la vegliadetgna. La finamira è d’avair sut tetg l'entira refurma enfin la fin da la sessiun. Anc datti dentant grondas differenzas. Betg perina èn las duas chombras per exempel davent da tge paja ch'ina persuna duai esser segirada en la segunda pitga. Ch'il tema è fitg dispitaivel mussa era il fatg ch'ils sindicats han gia annunzià il referendum cunter la revisiun.
Export d'armas
In auter tema che vegn a dar da discutar è la dumonda sche stadis che han cumprà armas svizras dastgan dar vinavant quellas a l'Ucraina. Las cumissiuns responsablas da las duas chombras beneventan quai e vulan perquai era modifitgar la lescha davart l’export d’armas. Il Cussegl federal è cunter. El sa referescha sin la neutralitad da la Svizra che na lubeschia betg tals re-exports en pajais en in conflict. Cunter lubir exports èn era la Partida verda e la Partida populara da la Svizra
Sper quai è era l’electricitad in grond tema en questa sessiun. Sper in eventual obligatori d’indriz solars sin ils tetgs vai era per la promoziun da projects da rodas da vent en Svizra.
