La Posta svizra stritga bun mintga tschintgavla filiala. Concret muntia quai che radund 170 filialas vegnan serradas fin il 2028, scriva la Posta svizra en ina communicaziun. Uschia restan en l'avegnir anc 600 uffizis postals e 2'000 lieus cun servetschs da posta. Pertutgada da la mesira radicala è tut la Svizra, uschia era il Grischun. Quantas filialas grischunas che la Posta svizra vul serrar na communitgescha ella betg. Ins veglia l'emprim discuorer cun las filialas e cun las vischnancas pertutgadas, ha ditg la posta sin dumonda da RTR. La finamira saja da chattar schliaziuns per ina nova furma da servetschs da posta. Actualmain datti en il Grischun anc 31 filialas da posta effectivas. Numerus servetschs da posta èn vegnids dischloccads ils onns passads sco agenturas en per exempel stizuns dal vitg.
Sbagl strategic
Per il cusseglier naziunal grischun Jon Pult è la decisiun da la Posta svizra in nausch pass, sco quai ch'el ha ditg envers RTR. En vista al fatg che la posta fetschia gronds gudogns, saja la mesira da serrar filialas in sbagl strategic:
![Die Post schliesst 170 Filialen](https://www.rtr.ch/static/cms/images/960w/104022.jpg)
Fatschentas classicas vi dal spurtegl, sco per exempel pajaments sajan era ils davos quatter onns ids enavos marcantamain, argumentescha la Posta svizra ses pass. E quai na vegnia era betg a sa midar en il futur. Ella s'adatteschia perquai al svilup cun reducir ulteriuras filialas.
Chapientscha, ma betg plaschair
Che la populaziun giaja adina pli pauc sin posta e fetschia adina pli pauc diever dals servetschs da la posta saja ina realitad, ha ditg il cusseglier naziunal grischun Martin Candinas sin dumonda da RTR. Plaschair n'haja el tuttina betg da la decisiun da la Posta svizra:
Disditgas na vegnia betg a dar, declera la posta plinavant. Anzi, la posta vegnia a media e lunga vista a duvrar dapli persunal. Vitiers vegnian las fluctuaziuns natiralas e pensiuns.
Betg acceptabel
Sco betg acceptabel taxescha la Gruppa svizra per las regiuns da muntogna la decisiun da la Posta svizra. Cunzunt en las regiuns da muntogna e sin la champagna saja la rait da filialas gia vegnida reducida memia fitg. Zunt critic vesa il sindicat Syndicom ils plans da la Posta. Quai muntia ina reducziun dal service public. Per la federaziun da persunal Transfair n'è la reducziun da la rait da postas betg ina surpraisa.