Fin ussa vegniva la posta sortida e distribuida per la Cadi en dus lieus, in a Trun ed in a Mustér. Quai è sa midà, uschia han las 10 postinas e postins uss sulet pli in lieu da lavur e quai è Trun en las localitads da l’anteriura fabrica da ponn. Surtut il plaz da pachetar ils pacs en ils autos è uss sut tetg e las localitads porschan avunda plaz era per sortir las brevs tut en in local, di Beat Egli il vice-manader da la distribuziun. Els hajan gia daditg tschertgà ina soluziun, pertge surtut en las veglias localitads a Trun era quai stretg ed ils pacs stuevan vegnir chargiads da tutt’aura ora en il liber. Era in avantatg è che tut las 10 persunas lavuran uss en in team e sch’ina persuna è malada u vul far in di liber alura èn ins pli flexibels, di Beat Egli.
Fin uss naginas reclamaziuns
Tge ch’è cler è che las rutas èn sa midadas e tscherts clients han pli baud la posta, auters pli tard, ma fin uss n’ha quai betg dà resuns, di Beat Egli. Quai era la finamira che la clientella na senta nagut da la midada. Ed en quest lieu è l’infrastructura moderna e correspunda al standard da la posta per exempel cun installaziuns per autos d’electro. Uschia èsi il mument planisà da mantegnair tut las plazzas da lavur era a Trun e da restar per ils proxims onns en l’anteriura fabrica da ponn cun la distribuziun a posta per la Cadi.
