Questa primavaira ha il Cussegl federal reagì sin squitsch or dal parlament ed ha adattà l’ordinaziun da la lescha da chatscha. Cun ina consultaziun pli curta èsi reussì da pudair metter en vigur las novas directivas durant la stagiun d’alp da quest onn.
Da nov bastan 10 stgarpadas da nursas u chauras per ch’in chantun dastgia regular la populaziun da lufs e sajettar singuls animals. Enfin ussa dastgavan ils chantuns far quai a partir da 15 animals stgarpads. Quella regla vala dentant be, sch'ils purs han prendì mesiras da protecziun per lur animals. Tar animals da niz gronds – biestga, chavals u lamas – bastan duas stgarpadas, ha il Cussegl federal precisà vinavant.
Chantuns da muntogna betg cuntents
Dentant na cuntentan quellas adattaziuns betg ils chantuns da muntogna. Oravant tut politicras e politichers burgais vulan pudair schluppettar pli simpel il luf. En il parlament datti differentas moziuns u interpellaziuns che s’occupan cun la bestga rapina. Tranter auter stat era puspè ina revisiun da la lescha da chatscha sin il program. Quella proposta vegn da la cumissiun per ambient, planisaziun dal territori ed energia (UREK) dal cussegl dals chantuns.
Era regulaziun preventiva en discussiun
La derasaziun dal luf duai pudair vegnir franada preventivamain cun in'adattaziun da la lescha da chatscha. Ins duai pudair sajettar lufs era da moda preventiva, uschia sco ils capricorns. La cumissiun vul controllar pli fitg la derasaziun dal luf. Avant ch’in sboz vegn dentant elavurà sto anc la cumissiun correspundenta dal Cussegl naziunal dar il consentiment. Quella ha spustà la discussiun sin l’entschatta da proxim onn. Tut ils projects pendents enturn il luf vul‘ins tractar ensemen. Uschia che ord il parlament federal pon ins spetgar moviment en chaussa l’emprim quartal dal 2022.
Resistenza programmada
Pro Natura ha ditg sin dumonda dad RTR ch'ella n'è insumma betg d'accord cun la proposta da la cumissiun per l'ambient dal cussegl dals chantuns. Tenor l'organisaziun d'ambient na resguarda la cumissiun betg la decisiun da la populaziun ch'haja ditg Na a la revisiun da la lescha da chatscha la fin settember 2020. La regulaziun preventiva dal luf è vegnida refusada a l'urna da la populaziun. Dad ussa vegnir cun quasi la medema proposta ch'era en votaziun saja ina decisiun a la svelta e malponderada.