La Banca naziunala svizra vesa l'augment da l'inflaziun actuala, sco fenomen temporar. La Banca centrala vegnia ad observar detagliadamain la situaziun, ha ditg il president da la BNS, Thomas Jordan. El craja persunalmain ch'ina gronda part da l'inflaziun actuala, varghia puspè. Tuttina dettia in relativamain grond risico ch'ina part da quella daventia in'inflaziun permanenta, ed influenzeschia lura er tutta rauba e servetschs.
Sche questa inflaziun cuntinueschia sco fin qua, stoppian las bancas centralas adattar lur politica monetara, per garantir ch'ellas na perdian betg lur credibladad en il cumbat per stabilisar ils pretschs. La BNS prefereschia da controllar l'inflaziun sur ils tschains, ha ditg Jordan. La Banca naziunala intervegn dentant er vinavant, en il martga da devisas, sch'il curs dal franc svizzer vegn memia ferm. Ina finamira per il curs na datti dentant betg.
La Gronda Britania ed ils Stadis Unids han gia auza ils tschains. La BNS n'ha anc betg midà ils tschains da minus 0,75%. Il mars ha la Svizra gì la pli auta chareschia annuala dapi 2008, cun 2,4%
