La Svizra è per 2 onns en il Cussegl da segirtad da las Naziuns unidas (ONU). L'assamblea generala a New York ha vuschà gievgia cun 187 da 190 vuschs valaivlas per recepir il pajais. La commembranza dura dal schaner 2023 fin il december 2024. Dasper la Svizra sesan ils proxims 2 onns er la Malta, il Giapun, il Mosambique e l'Ecuador en il pli pussant gremi da l'ONU.
Il president da la Confederaziun Ignazio Cassis è losch da quest resultat.
E tuttina: Quai na vegnia però betg a midar la politica da la Svizra ed ella na vegnia er betg a perder la neutralitad. Plitost saja quai nagut auter che normal da far quest pass suenter 20 onns commembradi a l'ONU.
Spetgà vegn engaschi per pasch e dretgs umans
L'organisaziun Amnesty international spetga che la Svizra s'engaschia surtut per la protecziun dals dretgs umans. Al confess per dretgs umans, la pasch e la segirtad stoppian ussa suandar acziuns, scriva l'organisaziun per dretgs umans Amnesty international sin Twitter. Era la Societad per pievels smanatschads spetga ina rolla activa da la Svizra che duai surprender responsabladad per dumondas da pasch e dretgs umans.
