En blers chantuns han cumenzà las vacanzas da stad. Per la plazza aviatica da Turitg vul quai dir: stagiun auta. Fin la fin d'avust quinta l'eroport cun dapli passagiers, durant ils dis da grond traffic cun passa 100'000 persunas. Els tuts vulan passar il pli svelt pussaivel tras la controlla da segirezza ed entrar en l'eroplan.
Per la controlla da segirtad ha l'eroport cumprà dus apparats novs per la stagiun principala: Els duain augmentar il confort dals viagiants. La pledadra da la plazza aviatica, Bettina Kunz, declera la nova tecnica ed ils avantatgs da quella.
Ils novs scanners CT fan in maletg en 3D dal cuntegn da la bagascha. Perquai na sto la glieud da nov betg pli prender or da la bagascha lur apparats electronics e liquids.
Empè da tschertgar cun fadia il laptop e la buttiglia d'aua or da la tastga u dal satgados e metter tut singul en chistas sin il bindel rullant, pon ils passagiers da nov laschar ir tras la maschina tut la bagascha da maun. Il scanner da la tomografia computerisada vesa cuntegns privlus.
Actualmain èn però pir dus tals apparats novs en funcziun – tar las 24 autras lingias vegn la glieud controllada cun ils apparats vegls. Ils scanners novs da CT vegnan ussa testads in pèr mais, di la pledadra da la plazza aviatica Bettina Kunz. «Per nus èsi impurtant da testar ils novs apparats durant differentas stagiuns», declera ella. La glieud portia la stad autras chaussas en la bagascha da maun che l'enviern.
Als viagiaturs plaschan ils novs apparats. Ina dunna che sgola cun sia famiglia en vacanzas en ils Stadis Unids manegia: «Jau chat quai fitg pratic, gist cura ch'ins va en viadi cun famiglia.» Lura avessan els numnadamain mintgamai tantas chaussas ch'els stuessan rumir individualmain. Ed er in ulteriur passagier che sgola en il Canada è cuntent da la novaziun: «Gist durant dis sco oz, cura che tanta glieud vul sgular, sun jau cuntent, sch'i va pli svelt.»
Pervia da quests avantatgs duajan suenter la fasa da test da plirs mais tut ils apparats vegnir remplazzads cun scanners CT, di la pledadra da la plazza aviatica, Bettina Kunz. Uschia possia passagiers ir uschè svelt sco pussaivel e senza problems tras la controlla da segirezza.
