La plazza aviatica da Turitg resta a la testa dals eroports europeics. Per la 6avla giada en seria è l'eroport svizzer vegnì onurà sco meglier eroport da l'Europa en la categoria da 25 fin 40 milliuns passagiers. Era tar il World Travel Award haja ella da novamain cuntanschì l'emprima plazza, scriva l'eroport da Turitg. Il premi vegn surdà mintg'onn da l'associaziun tetgala internaziunala dals gestiunaris d'eroports. Ella sa basa sin ina retschertga tar clientas e clients.
La retschertga cumpiglia 34 differentas categorias, sco per exempel:
- infrastructura
- controllas da segirezza
- pussaivladads da mangiar e baiver
- mesiras d'igiena
Premi da grond'impurtanza
Per la plazza aviatica da Turitg saja da grond'impurtanza da pudair garantir als passagiers in'auta qualitad. Quai pretendia però er ina buna collavuraziun tranter tut ils partenaris, di il CEO da l'eroport Lukas Brosi. Els sa legrian perquai fitg da puspè avair survegnì dus dals pli impurtants premis en la branscha da sgol.
