Il Cussegl federal duai suttascriver ils contracts da cumpra per ils 36 aviuns da cumbat F-35 enfin la fin da mars 2023 e betg spitgar in’eventuala votaziun davart l’iniziativa «Stop F-35». Quai pretenda la cumissiun da segirtad dal Cussegl dals chantuns. Ella vul perquai francar in artitgel correspondent en il messadi da l'armada.
La cumissiun veglia uschia impedir che l'offerta dal producent american Lockheed Martin scada, ha il president da la cumissiun, il cusseglier dal stans Werner Salzmann ditg avant las medias a Berna.
Glista da spetga saja gronda
Il Cussegl federal aveva fin uss l'intenziun da spitgar la decisiun davart l'iniziativa e betg suttascriver ils contracts avant. La situaziun saja uss dentant ina tut autra, ha Salzmann ditg. La guerra en l'Ucraina e la decisiun da plirs stadis europeics da cumprar ils medems aviuns da cumbat sco la Svizra, pericliteschian il plan da remplazzar ils aviuns F/A-18 enfin il 2030 cun 36 aviuns F-35. Sappi la Svizra betg suttascriver ils contracts avant che l'offerta scada, saja da quintar cun custs pli auts e ch'ins stoppi spitgar pli ditg sin ils aviuns. Quai che metti en privel la segirtad dal spazi aviatic svizzer, uschia Salzmann. Tenor Salzmann sustegna la ministra da la defensiun, Viola Amherd, da concluder svelt il contract.
In votum per la Patrouille Suisse
Cun la cumpra dals novs aviuns daventa er il futur da la Patrouille Suisse intschert. Ils aviuns dal tip F-5 che servan a la squadriglia da sgol acrobatic, duessan numnadamain ir en pensiun.
La maioritad da la cumissiun da segirtad dal Cussegl dals chantuns vul uss spustar la decisiun. I saja ina dumonda emoziunala, hai num. E la Patrouille Suisse saja in product da parada da l’armada svizra. Plirs parlamentaris en la cumissiun èn dentant da l’avis, ch'ins stoppia uss esser consequent e tschertgar autras schliaziuns per mantegnair la Patrouille Suisse.