Il chantun Vallais na po betg decimar il triep da lufs en la Val d'Hérens. Las cundiziuns n'èn betg ademplidas perquai che pliras nursas stgarpadas eran passa 100 meters davent da la pastgira da notg e n'hajan uschia betg pudì vegnir protegidas bain avunda dals chauns. Il tribunal federal administrativ ha confermà ina decisiun da l'Uffizi federal d'ambient Bafu.
Criteri admess
Il recurs dal chantun ch'aveva contestà la refusa da las reducziuns, ha il derschader refusà. En il fratemp ha il Cussegl federal reducì il dumber minimal d'animals mazzads per ina regulaziun.
En sia sentenzia publitgada la gievgia scriva la dretgira che la regulaziun da trieps dependia da donns effectivs vi d'animals da niz u d'in privel serius per l'uman. Il luf restia ina spezia d'animals protegida rigurusamain, e ses mazzament dastgia avair lieu mo sco ultim med.
Per registrar ils donns n' èn els perquai betg vegnids resguardads. Per quest motiv n'è il dumber minimal da 10 animals da niz stgarpads betg vegnì cuntanschì entaifer quatter mais, ch'è necessari per ina prelevaziun.
Triep cumpact
Il Bafu possia fixar tge mesiras da protecziun che sajan pretendiblas per las possessuras ed ils possessurs d'animals. Latiers s'audia era l'acziun da chauns – quel saja dentant mo effectiv, sche la muntanera restia cumpacta.
Per il Tribunal administrativ federal na datti nagins indizis che l'uffizi federal n'avess betg resguardà che animals da niz possian fugir en cas d'ina attatga. La distanza da 100 meters che vegn tschernida per resguardar victimas saja permessa.
Questa libertad d'agir resulta dal fatg ch'i n'è betg pussaivel da predir exactamain il cumportament dals animals. La sentenzia po anc vegnir contestada davant il Tribunal federal.