«Viver meglier en la pensiun»
L'Assicuranza per vegls e survivents (AVS) è il fundament dal provediment da vegliadetgna en Svizra. Passa 2,5 milliuns persunas pensiunadas survegnan actualmain ina renta da la AVS. La renta duai cuvrir commensuradamain il basegn d'existenza en la vegliadetgna. La gronda part da las persunas pensiunadas han anc ulteriuras entradas, en spezial ina renta da la cassa da pensiun. Tgi che na vegn betg da cuvrir ses custs da viver uschia, ha il dretg sin prestaziuns supplementaras.
L'iniziativa vul auzar las rentas da vegliadetgna da la AVS per ina renta mensila. Sper las 12 rentas mensilas vegniss pajada mintga onn ina 13avla renta. L'iniziativa prescriva era che las prestaziuns supplementaras na dastgian betg vegnir reducidas pervia da la 13avla renta.
Ina 13avla renta correspunda ad in augment da la renta annuala per 8,3%. La renta da vegliadetgna annuala minimala da persunas singulas s'augmentass per 1'225 sin 15'925 francs. La renta maximala per 2'450 sin 31'850 francs, la renta maximala da conjugals per 3'675 sin 47'775 francs.
Pro e contra
Per il comité d'iniziativa dovria ina 13avla renta da la AVS, perquai che la renta tanschia per adina damain pervia da custs che creschan. Ils tschains da locaziun, las premias da las cassas da malsauns e las victualias: Tut vegnia pli char. Adina dapli persunas pensiunadas hajan fadia da sa tegnair sur l'aua. Tenor il comité sajan ils meds per finanziar la 13avla renta da la AVS avant maun.
Il Cussegl federal ed il parlament na vesan nagina libertad finanziala per ina 13avla renta da la AVS. Stabilisar la AVS e segirar las rentas haja prioritad. La gronda part da las persunas pensiunadas na saja betg dependenta d'ina 13avla renta. E persunas cun paucs meds finanzials survegnian prestaziuns supplementaras.
Recumandaziuns
Il Cussegl federal ed il parlament recumondan da dir Na a l'iniziativa per ina 13avla renta da la AVS.
