«Per in provediment da vegliadetgna segir e duraivel»
L'AVS è il fundament dal provediment da vegliadetgna. Per garantir las rentas han il Cussegl federal ed il parlament concludì duas refurmas ils ultims tschintg onns. Quellas augmentan las entradas e reduceschan las expensas da la AVS. Per exempel han ins auzà las contribuziuns dals salaris e la taglia sin la plivalur. Ultra da quai vegn la vegliadetgna da pensiun da las dunnas auzada pass per pass sin 65 onns a partir dal 2025. Il pievel ha acceptà questas refurmas. Las finanzas da la AVS èn uschia stabilisadas fin circa l'onn 2030.
Per il temp suenter l'onn 2030 èn necessarias ulteriuras mesiras per segirar las rentas. Cunzunt per dus motivs: Per l'ina s'augmenta il dumber da las persunas pensiunadas pli svelt ch'il dumber da las persunas cun activitad da gudogn che finanzieschan las rentas. Per l'autra crescha l'aspectativa da vita e per consequenza ston las rentas vegnir pajadas pli ditg.
L'iniziativa vul segirar duraivlamain la finanziaziun da la AVS cun auzar la vegliadetgna da pensiun sco era francar en la constituziun in automatissem per calcular la vegliadetgna da pensiun. Ella prevesa duas etappas. Sco emprim duai la vegliadetgna da pensiun da las dunnas e dals umens vegnir auzada sin 66 onns. Quai vegniss fatg pass per pass dal 2028 fin il 2033. Suenter l'onn 2033 duai la vegliadetgna da pensiun vegnir auzada vinavant automaticamain, sche l'aspectativa da vita media crescha.
Pro e contra
Per il comité d'iniziativa èsi cler: La AVS è en ina crisa finanziala – sch'ins na fetschia nagut, sajan las rentas en privel. L'iniziativa da rentas mitigeschia quest privel, senza ch'i dovria reducziuns da las rentas, taglias supplementaras u novs debits. Ella saja la soluziun optimala, moderada, sociala e gista per tut las generaziuns.
Cun l'iniziativa vegniss la vegliadetgna da pensiun fixada en il futur sulettamain tras ina furmla matematica. In tal automatissem è memia pauc flexibel per il Cussegl federal ed il parlament. Per fixar la vegliadetgna da pensiun stoppian adina vegnir resguardads differents aspects, per exempel il svilup da l'economia e dal martgà da lavur, uschia l'argumentaziun encunter l'iniziativa.
Recumandaziuns
Il Cussegl federal ed il parlament recumondan da dir Na a l'iniziativa da rentas.
