En connex cun la taglia anticipada han bleras persunas be cun emplenir ils formulars da taglia mintg'onn: Là èsi d'inditgar il tschains. Persunas privatas cun sedia en Svizra che fan quai correct, pia che nodan ils gudogns sin obligaziuns, pon dumandar enavos 35% taglia anticipada.
Il Cussegl federal conceda ch'i sa tracta dad ina mini-refurma – tuttina saja quella impurtanta. Perquai cusseglian regenza e parlament d'acceptar quella a l'urna. Ina da las finamiras centralas è tenor il Cussegl federal da augmentar l'attracivitad u mantegnair attractiva la Svizra sco plazza economica. Quai entras abolir almain parzialmain ina taglia che n'exista betg en blers auters pajais. Uschia duajan firmas che dattan pervi da quai or obligaziuns en l'exteriur vegnir intimadas da far quai en l'avegnir en Svizra.
Betg d'accord va la sanestra: In comité da la Partida socialdemocratica, la Partida verda e sindicats ha rimnà bunamain 60'000 suttascripziuns. Entras quest referendum inoltrà l'avrigl 2022 vegn la refurma la fin da settember a l'urna.
Entras il referendum èn er gia las posiziuns cleras: La sanestra cumbatta la refurma – entant che partidas burgaisas sustegnan ella. Per las parolas uffizialas han anc las delegadas e delegads da las partidas l'ultim pled en chapitel.
Svizras e Svizzers decidan ils 25 da settember schebain la taglia anticipada vegn abolida u sche tut resta sco fin qua.
Sin in clic tut davart las votaziuns dals 25 da settember.