L'onn proxim creschan las premias per las cassas da malsauns en media per 6,6% en Svizra, quai vul dir ch'igl è da pajar en media 334,70 francs al mais. La premia per uffants s'augmenta medemamain – dentant betg uschè ferm.
Situaziun en il Grischun
En il Grischun creschan las premias en media per 6,8% sin 294,10 francs. La survista detagliada tenor categorias (en media pro mais):
- Persunas sur 26 onns : 340 francs (+6,4% ubain +20,30 francs)
- Persunas tranter 19-25 onns : 235,90 francs (+7,3% ubain +16 francs)
- Uffants fin 18 onns : 92,30 francs (+6% ubain +5,20 francs)
Situaziun en Svizra
L'onn current han Svizras e Svizzers pajà en media pli pauc - per l'emprima giada dapi l'onn 2008. Uss dentant creschan las premias puspè en media per 6,6%. Tenor categoria munta quai (en media pro mais):
- Persunas sur 26 onns : 397,20 francs (+6,6% ubain +24,50 francs)
- Persunas tranter 19-25 onns : 279,90 francs (+6,3% ubain +16,50 francs)
- Uffants fin 18 onns : 105 francs (+5,5% ubain +5,40 francs)
Las premias creschan en tut ils chantuns – i dat dentant differenzas:
«I dovra ina correctura ensi»
Las premias sajan in spievel dals custs da sanadad, argumentescha il minister da sanadad Alain Berset. Suenter quatter onns stabils, saja l'augment per l'onn proxim dentant considerabel. La raschun è surtut la pandemia da Covid-19 che ha strapatschà fermamain il sistem da sandad. D'in maun ha la pandemia chaschunà custs directs (tractament da pazientas e pazients ubain vaccinaziuns) e da l'auter maun sa resultan er custs indirects (tractaments medicinals ch'èn vegnids spustads).
Ils onns 2021 e 2022 n'han las premias plinavant betg cuvert ils custs – quai ston ins uss curreger en vista a l'onn proxim. Las premias per las cassas da malsauns vegnan numnadamain calculadas ordavant sin basa da stimaziuns. Quai saja stà spezialmain grev durant la pandemia, hai num en ina communicaziun da l'Uffizi federal da sanadad BAG.
Reducziuns da premias custan ils chantuns
Cun las premias da las cassas da malsauns che creschan pudessan er ils custs per las reducziuns da las premias crescher. Per ils chantuns munta quai ch’els ston budgetar dapli daners. Chantuns e la Confederaziun partan ils custs per la reducziun da premias.
Chantuns sco Basilea-Citad u Turitg han gia annunzià d'augmentar la reducziun da premias, uschia ch'ils custs per la sanadad stettian medem en il chantun per la populaziun. En divers chantuns ed en il Parlament federal pretenda la sanestra dapli daners per las reducziuns da las premias
