Suenter il Cussegl naziunal ha era il Cussegl dals chantuns approvà ils credits transitorics da dapli che 57 milliardas francs en connex cun la crisa da corona. Era la Chombra pitschna ha refusà tut las dumondas da scursanir ils credits.
Cunter la veglia da la PPS ha il Cussegl dals chantuns approvà ulteriurs 65 milliuns francs per sustegnair canortas d'uffants pitschens. Il Cussegl naziunal aveva decis ier 100 milliuns francs – uschia che quai dovra uss anc ina cunvegna davart da la summa exacta.
Credits per branscha aviatica dattan da discutar
Las pli grondas discussiun hai era dà en il Cussegl dals chantuns pertutgant l'agid per l'aviaziun . Per che la Confederaziun po sustegnair sper las societads aviaticas Swiss ed Edelweiss era manaschis che lavuran per l'aviatica sin eroports svizzers, dovria ina nova basa legala. Quella ha il parlament ussa stgaffì.
Suenter il Cussegl dals chantuns ha era il Cussegl naziunal approvà la modificaziun urgenta da la lescha federala. Quai è la basa per il credit da 600 milliuns francs, per exempel per interpresas da spediziun da vitgira u era spediziun da bagascha.
Cun pitschnas differenzas va la fatschenta enavos al Cussegl dals chantuns.
