La pandemia da corona n’ha strusch gì in effect sin l’agid social en Svizra l’onn 2020. La quota da l’agid social è restada tar 3,2%. Quai mussan las cifras da l’Uffizi federal da statistica.
In plus minimal
Grazia a las mesiras da sustegn da la Confederaziun e dals chantuns n'è il dumber da las benefiziarias e benefiziaris da l’agid social strusch creschì.
L'emprim onn da corona han 272'100 persunas survegnì almain ina giada agid social en furma da daners. Quai eran 633 persunas dapli che l'onn avant. Il plus da 0,2% n'ha dentant gì nagin effect sin la quota da l'agid social da la populaziun svizra.
Pli grev da turnar en il martgà da lavur
I saja però pli grev da vegnir or da l’agid social. Uschia han be radund 48'600 perchasa pudì vegnir libers da l'agid social il 2020, quai èn radund 4,5% pli paucs che l'onn avant. Ultra da quai han damain persunas pudì turnar en il martgà da lavur il 2020 ch’ils onns avant.
Il dumber da benefiziarias e benefiziaris che survegnian autras prestaziuns socialas è dentant creschì.
