Ils sindicats svizzers acceptan ils augments da paja per quest onn en bleras branschas. Els pretendan dentant ulteriurs pass dals patruns. «Ina paja duai tanscher per viver», uschia la pretensiun. Concret pretendan els il suandant:
- in augment da la paja reala
- ina cumpensaziun automatica da la chareschia
- ina paja minimala da 5'000 francs per persunas ch'han fatg in emprendissadi
- ed almain 4'500 francs per las persunas senza emprendissadi.
Tar las contractivas da paja saja sa mussà ch'ils patruns augmentian bain ils pretschs, ch'i vegni però budgetà fitg pedant tar las pajas. La forza da cumpra stoppia però tegnair pitg cun la producziun uschiglio manchia la dumonda, avertescha l'uniun sindicala.
Differenza trantar la paja la pli auta e la paja la pli bassa vegn pli gronda
Lavurants cun pajas bassas u mesaunas survegnan oz real pli pauc paja ch'anc il 2016. Ì ensi èn be las pajas da las persunas che gudognan il pli bler. Quai stat en il rapport da repartiziun da la SGB, l'uniun sindicala Svizra, ch'è vegnì publitgà glindesdi.
