L'ovra atomara da Mühleberg vegn messa ord funcziun dapi il december 2019, suenter 47 onns da gestiun. Fin ussa giaja tut tenor plan, scriva il concern d'energia BKW.
102 dals 418 elements combustibels sajan vegnids transportads en il deposit temporar a Würenlingen en il chantun Argovia. Fin proxima primavaira duai lura il transport da tut ils elements combustibels esser a fin. Pir suenter che la segunda fasa è a fin duai lura l'areal da l'anteriura ovra atomara da Mühleberg esser libra da radioactivitad. L'ovra en il vest da Berna è l'emprima da la Svizra che vegn prendida davent da la rait.
