Durant tschintg mais ad onn duain ins en Svizra pudair sajettar lufs avant ch'els fan donns, pia gia avant ch'els han stgarpà animals da niz. Il Cussegl federal ha tramiss en consultaziun l'ordinaziun da chatscha revidida. La chatscha preventiva da lufs entras ils chantuns duai mintg'onn esser pussaivla tranter il prim da settember ed ils 31 da schaner. Il rest da l'onn duain ils chantuns pudair sajettar lufs u trieps che fan problems cun ina lubientscha da l'Uffizi federal d'ambient.
En tuts dus cas ston tschertas premissas esser ademplidas. L'Uffizi federal d'ambient sto lubir las dumondas da regulaziun chantunalas. Pericliteschan singuls lufs persunas na dovri nagina lubientscha da l'uffizi federal.
La consultaziun per l'ordinaziun da chatscha revidida cuzza fin ils 5 da fanadur. En vigur duai ella ir il prim da favrer 2025. L'ordinaziun concretisescha las midadas ch'il parlament aveva decis la stad passada.
Gia la fin da l'onn passà aveva il Cussegl federal lubì ina regulaziun preventiva dal luf. Quellas lubientschas specialas eran gia part da l'ordinaziun da chatscha revidida che va ussa en consultaziun. Tranter il december 2023 ed il schaner 2024 avevan ils chantuns sajettà en tut la Svizra 38 lufs.
Ordinaziun s'occupa era d'auters animals protegids
Sper la regulaziun dals lufs reglescha l'ordinaziun da chatscha revidida era intervenziuns en connex cun capricorns e casturs. Ultra da quai propona ella ina organisaziun nova da la protecziun da muntanera. En connex cun la protecziun da muntanera survegnan ils chantuns dapli cumpetenzas e l'administraziun duai vegnir pli simpla.
Fin il favrer 2025 vala l'ordinaziun qua sutvart: