Cun ina vaccinaziun supplementara tar persunas spezialmain periclitadas pudess ins almain limitar il privel d'in grev decurs. Quai ha ditg Christoph Berger, schef da la Cumissiun per dumondas da vaccinaziun, oz avant las medias. Il dretg mument per il booster saja dentant fitg impurtant. Er il chantun Grischun sustegna la recumandaziun da la Confederaziun.
L'atun duain lura tut las persunas sur 16 onns sa laschar vaccinar in'ulteriura giada, ha communitgà il BAG. Questa recumandaziun sa drizzia cunzunt a persunas spezialmain periclitadas ed ad il persunal da sanadad.
Vaccinaziun per viadis
Persunas che vulan prolungar il certificat da Covid per ir sin viadi, possian dentant gia uss far sin agens custs ina segunda vaccinaziun da rinfrestgament. Quai ha scrit il chantun Grischun en ina communicaziun. In segund booster survegnan mo persunas a partir da 12 onns ch’han gì l’emprim booster avant dapli che 4 mais u il pli baud 4 emnas suenter in’infecziun. Ils custs muntan a 60 francs.
Dapli infurmaziuns
La vaccinaziun capita ordaifer da la recumandaziun da la Cumissiun federala per vaccinaziuns. Vinavant gratuitas restan las emprimas duas dosas (immunisaziun da basa), l’emprim booster, vaccinaziuns per persunas cun grevas defizienzas d’immunitad ed il segund booster per persunas a partir dad 80 onns.
Prognosa per la stad e l'atun
Actualmain va enturn l' Omicron . Il punct culminant vegn spetgà il fanadur, però saja grev da far prognosas pervia da las vacanzas da stad, di Rudolf Hauri da l'Uniun dals medis chantunals. Las cifras na sajan dentant anc betg alarmantas. Las ospitalisaziuns èn en tschertas regiuns puspè s'augmentadas.
En vista a l'atun e l'enviern quintan ils experts dentant, che las cifras d'infecziun s'augmentan puspè.
Nus spetgain ina nova unda l'atun e l'enviern.
