La cumpra da 96 panzers Leopard 1 entras la Ruag il 2016 vegn intercurida extern. La ministra da defensiun Viola Amherd haja dà l'incumbensa, annunzia il Departament federal per defensiun, VBS. Per l'ina duain las circumstanzas da la cumpra vegnir eruidas. Tenor la Ruag sajan ils panzers stads planisads per tocs da reserva e per la vendita.
Per l'autra vegn intercurì in contract da quest favrer cun il concern tudestg Rheinmetall ch’è co-producent dals Leopard 1. L'interpresa aveva declerà che quels panzers duajan vegnir restaurads e furnids en l'Ucraina. La Ruag aveva fatg attent ch'i dovria la lubientscha da la Confederaziun.
Il zercladur hai alura dà ina uffiziala dumonda d'export per ils 96 panzers. Il Cussegl federal n'ha dentant betg dà la lubientscha.
Dissonanzas tar la cumpra dals panzers
A chaschun d'ina sesida extraordinaria dal cussegl d'administraziun da la Ruag da la dumengia sajan vegnidas constatadas ulteriuras irregularitads en connex cun la cumpra dals panzers, scriva il VBS sin incumbensa da Amherd. La scheffa dal departament saja vegnida infurmada dal president dal cussegl d'administraziun. Las examinaziuns duain mussar, sch'i dovra adattaziuns tar la collavuraziun tranter la Ruag e la Confederaziun sco possessura. Plinavant vegn intercurì, co ch'il cussegl d'administraziun controllescha la direcziun da l'interpresa.
Examinaziun da la Ruag sezza
In'ulteriura examinaziun externa ha la Ruag instradà sezza, sco l'interpresa ha communitgà il glindesdi. Il mument na saja betg tut cler ed i dettia anc irregularitads. Ins stoppia sclerir, sch'ina interpresa tudestga posseda gia 25 da quels panzers. Quella ha para avant quatter onns cumprà quels da la Ruag. I n'è dentant betg cler, tge ch'è succedì suenter.
La cumpradra GLS pretenda ils leopards cumprads
Entant è sa mussada la cumpradra dals Leopards: La Global Logistics Support GmbH (GLS) en Germania ha confermà d'avair cumprà ils 25 Leopards il november 2019 e pretenda ussa che la Ruag mettia a disposiziun quests. Betg cler è anc actualmain, sche la GLS vul eventualmain dar vinavant ils Leopards a l'Ucraina. Qua na vul la firma però betg prender posiziun.
Da la vart dal Secretariat statal per economia (Seco) hai mo num ch'ins evalueschia l'entira situaziun. Surtut sche la cumpra da quests panzers il november 2019 ha gì ina lubientscha, e sch'i dovra ussa eventualmain ina nova lubientscha per exportar.
