Dapi che la cunvegna da basa cun l’UE ha fatg naufragi, n’ha Meteo Schweiz betg pli la pussaivladad da sa participar a projects europeics sco antruras. Quai ha ditg il directur da Meteo Schweiz Christof Appenzeller en in’intervista cun las gasettas da Tamedia.
Pli baud sajan els stads in partenari impurtant tar projects da l’Uniun europeica, en spezial tar projects per eveniments da l’aura extrems e dal clima. Uss na paja l’UE dentant nagins daners pli per projects da svilup innovativs. Meteo Schweiz emprovia da cumpensar il donn a moda bilaterala cun auters projects cun la Germania e l’Italia, ha declerà Appenzeller.
