Snow for home (snow4home), per rumantsch naiv per a chasa. Uschia sa numna ina firma austriaca. Ella producescha in chanun da naiv che sa lascha duvrar er en l'iert. Per che quai funcziunia dovran ins anc in nettegiader a pressiun auta ed in cumpressur.
Dus meters cubics naiv en in’ura fa il chanun sche las temperaturas èn almain minus trais grads celsius. Tgi che vul sa prestar quai sto investir 400 fin 600 euros. Tenor l’um da fatschenta fan quai mintg’onn var 100 fin 200 persunas. Ina mesadad da quels chanuns sa tschentan en ierts privats, nua ch’ils uffants pon duvrar quels per ir a giugar, di il possessur da la firma Christopher Hölzl.
Er en Svizra datti chanuns pitschens
Era en Svizra porscha ina firma in product sumegliant. I sa tracta d’ina lingia da naiv da trais meters che funcziuna bunamain sco quella da l’Austria, ella custa simplamain 2’300 francs. Il conpossessur da la firma Bächler, Mario Koch, di ch’els vendian lur lingias da naiv plitost a fatschentas sco hotels, ustarias u runals pitschens.
Sia fatschenta sa concentrescha dapli sin chanuns da naiv gronds per las pistas da skis e venda be paucas lantschas pitschnas. Quai èn var 10 fin 20 lantschas per stagiun. Promover questa lantscha n'è betg la finamira, mabain da duvrar ella sapientivamain nua ch'i fa basegn.
La dumonda da persistenza
La dumonda co che la protecziun dal clima ed il spargnar energia s'accordan cun chanuns da naiv per il diever privat, guntgescha Mario Koch dentant. El accentuescha l'effizienza energetica da gronds chanuns da naiv da sia firma.
Auter che la firma svizra venda la firma austriaca da Christopher Hölzl mo chanuns da naiv pitschens per il curtin. Ses diever d’energia relativescha el cun ils custs. Da laschar ir in chanun per in’ura custa be var 1 euro.
Ma pli bunmartgà èsi en mintga cas da spetgar fin che la naiv croda giu da tschiel.
