En las direcziuns da las fatschentas sesan entant 24% dunnas. Avant dus onns eran quai anc 19%. Cun quai è la Svizra en l’Europa da nov sin rang sis davos la Gronda Britannia, la Norvegia, la Svezia, la Finlanda e la Frantscha, ch'han tuts anc dapli dunnas en l'etascha da schef. Quai mussa ina nova evaluaziun dal cussegliader da persunal internaziunal Russell Reynolds.
Analisadas èn vegnidas las 48 firmas las pli grondas ch'èn quotadas a la bursa. Oravant tut l’industria da finanzas svizra è s'avanzada cun il mix da las schlattainas. Uschia han l’UBS, Partners Group, la Credit Suisse e l’assicuranza Zürich fin bundant 40% dunnas en il gremi directiv superiur.
Differenzas en la branschas
Dunnas en ina funcziun da cader èn pli raras da firmas d'industria. Qua datti intginas firmas che n'han insumma nagina dunna en la direcziun.
Pertge che bancas ed assicuranzas han dapli dunnas en funcziuns autas declera Cornelia Tänzler, responsabla per il studi tar Russell Reynolds: «Simplamain pervia da la grondezza da las interpresas ed er, perquai che quellas firmas han effectivamain la finamira da promover dunnas.»
Be ina dunna sco CEO
Quai cun la rolla da CEO na funcziuna dentant anc adina strusch en Svizra. Be ina firma da las 48 interpresas examinadas vegn manada d’ina dunna, numnadamain la Ems Chemia cun Magdalena Martullo-Blocher.
