Durant la notg da sonda sin dumengia mida l'ura puspè. Las 3:00 vegn l'ura messa enavos per in'ura sin il temp d'enviern. Blers umans han plaschair perquai ch'ins po durmir in'ura pli ditg. Dentant betg tuts: Uschia hai dà il 2019 in’iniziativa dal pievel che pretenda ch’i vala mo pli il temp da l'Europa centrala – quai ch’è actualmain il temp d’enviern. Quella iniziativa n’ha dentant betg gì success.
Midament da l'ura è in privel per la selvaschina
Per la selvaschina è quest midament dentant in grond privel. Tenor il Club d’autos Europa dettia en l’emna suenter la midada da l’ura var 30% dapli accidents sin via ch’uschiglio.
Blers animals sajan numnadamain surdumandads, sche l’intensitad dal traffic sa midia tuttenina en consequenza dal midament da l’ura, scriva la Protecziun svizra dals animals. Cunquai ch’i vegnia pli baud stgir la saira, sajan er dapli autos sin via. Exact da quest temp saja er la selvaschina savens a la tschertga da maglia, uschia ch’ella stoppia savens traversar vias. Perquai creschia il privel da collisiuns.
La Protecziun svizra dals animals avertescha perquai ils automobilists da collisiuns cun animals selvadis.
Or da l'archiv
