La Confederaziun vul puspè surpigliar ils custs per tests da corona. Tgi che vul sa laschar testar per pudair survegnir il certificat, po bainprest puspè far quai. Il Cussegl naziunal ed il Cussegl dals chantuns èn sa cunvegnids sin regulaziuns correspundentas. I dat dentant excepziuns dals tests gratuits – la Confederaziun na surpiglia betg ils custs per auto-tests, sco er betg per tests da PCR per viadis a l'exteriur. Il Cussegl naziunal leva atgnamain che tut ils tests vegnan surprendì da la Confederaziun. Ad il Cussegl dals chantuns è quai dentant ì memia lunsch.
Il parlament discutescha actualmain davart la lescha da Covid-19 cunquai che tschertas mesiras scadan cun la fin dal onn. Pervia da la situaziun actuala ha il Cussegl federal fatg la dumonda al parlament da prolungar las mesiras. Tar tschertas midadas datti anc differenzas. Il project da la lescha va perquai puspè enavos tar il Cussegl dals chantuns.