Tenor Manuel Wenk, pledader da medias da l'interpresa online digitec galaxus, saja vegnì vendì ils davos mais en cumparegliaziun cun l'onn passà enfin 270%. Cumenzà haja il boom l'october, il november sajan las cifras perfin anc stadas pli autas. Uschia sajan vegnì vendì il november perfin 130% dapli radios DAB+ che il october.
Quai conferma era la pledadra da medias da interdiscount, Salome Balmer. Avant il october hajan els strusch vendì radios DAB+ e surtut il december curt avant Nadal hajan blers cumprà in radio DAB+. Era tar Fust e tar Mediamarkt saja la vendita creschida fitg ils davos mais. Per part haja era dà tar las interpresas temps da spetga pli lungs e mancanza da tscherts products. Surtut tar ils adapters per ils autos.
Bleras dumondas tar la clientella
Era tar fatschentas pli pitschnas tuna sumegliant. Marco Fasciati che maina ina fatschenta d'electronica a San Murezzan ed è gia dapi 44 onns en la branscha d'electronica di, ch'i haja durant sia carriera professiunala anc mai dà in sumegliant boom sin in product. Ed anc mai haja la clientella tschentà uschè bleras dumondas ed hajan era per part pauc enclegientscha per questa midada. Tscherts hajan perfin il sentiment che la branscha d'electronica saja responsabla per la midada. Cun declerar e respunder las dumondas emprovia Marco Faciati dentant da sclerir e da far attent sin ils avantatgs dad in radio DAB+.
Sfidas tecnicas al cumenzament
Dapi la midada da UKW sin DAB avain nus da RTR survegnì resuns ch’i dettia interrupziuns tar la colliaziun. Noss expert da tecnica Corsin Gadola ha la suandonta teoria:
«Novs sistems en l'auto pon vegnir installads uschia ch'els tschertgan il signal d'UKW, sch'il signal da DAB è memia flaivel. Cunquai che UKW è vegnì tschentà giu, tschertga l'apparat en il vid e perquai datti interrupziuns. Ma quai è mo mia teoria», di Corsin Gadola.
Sch'igl avess da dar problems, supplitgain nus da rimnar las infurmaziuns ed annunziar quellas sin broadcast.ch . Uschia pon ils responsabels da la SRG SSR analisar ed eliminar ils problems uschè svelt sco pussaivel.
Alternativas da DAB tar interrupziuns da la rait
La varianta la pli simpla è da sa colliar cun bluetooth cun il sistem ch'è gia integrà e da streamar l'emettur. In'autra varianta è da colliar cun bluetooth sur in adapter sche l'auto n'ha betg gia integrà quella funcziun. Premissa che quai funcziunescha è ch'ins ha ina colliaziun d'internet.
Il medem vala era a chasa. Là datti dentant anc in zic dapli alternativas en furma da differents apparats. Là pon ins er tadlar radio sur il computer, laptop, iPad ubain televisiun. L'unica cundiziun è che l'apparat è collià cun l'internet. Er cun apparats intelligents sco Alexa ubain assistent da Google pon ins tadlar radio rumantsch.