Stizuns dal vitg – betg be in lieu da provediment, mabain er in lieu nua ch’ins s’entaupa. Ellas mettan a disposiziun products unics e regiunals e stgaffeschan uschia ina plivalur. Sche las stizuns serran, po quai dar ina perdita per l’attractivitad d'in vitg per indigens sco er per ils giasts. Mo co spendrar ellas?
A quella dumonda è la Gruppa svizra per las regiuns da muntogna (SAB) ed l’Agid svizzer per la muntogna (ASM) sa deditgada ad ina sessiun en la citad da Berna. Var 80 participantas e participants han fatg part a la seduta nua ch'i è vegnì demussà pussaivladads d’agir cun exempels concrets.
-
Bild 1 von 3Legenda: La stizun da 24 uras a Vignogn. RTR -
Bild 2 von 3Legenda: Ina visualisaziun da la stizun nova, nua ch’ils products regiunals vegnan alura plazzads prominent. RTR
-
Bild 3 von 3Legenda: Gianfranco Soller, il mainaproject en las localitads a Vignogn. RTR
Co far frunt a centers da cumpra?
Sch’i vegn bajegià in nov center da cumpra, po quai avair la consequenza ch’ina u pliras stizuns dal vitg èn las vischnancas vischinantas ston serrar. Ina schliaziun per evitar quest scenari è la digitalisaziun. La digitalisaziun po gidar da flexibilisar ils temps d’avertura e da simplifitgar ils process da lavur, uschia che ils cust da manaschi restan uschè bass sco pussaivel.
Assistenza per planisaziun e finanziaziun
La Gruppa svizra per las regiuns da muntogna po cussegliar las vischnancas e las regiuns en furma concepziunala, sch’i va per far patratgs davart il futur da las stizuns dal vitg. L’Agid svizzer per la muntogna po lura sustegnair finanzialmain projects da questas stizuns. Premissa è ch'ellas vegnian conpurtadas da la populaziun locala.
Uschia ina dumonda ha «la stizun» a Vignogn fatg a l’Agid svizzer per la muntogna. La stizun da 24 uras è digitalisada e concepida uschia che l’access saja pussaivel cun ina carta da banca. Pia in concept innovativ. La dumonda ha purtà fritg ed è vegnida valitada positiva, uschia che la stizun vegn sustegnida finanzialmain da l’Agid svizzer per la muntogna.