A partir dals 31 da matg schlucca il Cussegl federal las suandantas mesiras:
![purtret cun las schluccadas.](https://www.rtr.ch/static/cms/images/960w/f76e11.jpg)
Gastronomia: Ustarias e bars dastgan puspè avrir dal tut. I vala dentant in obligatori da mascras e da registrar las datas persunalas. Sin las terrassas èn da nov 6 persunas per maisa lubidas, dadens èn mintgamai 4 persunas vid maisa lubidas.
Occurrenzas: Tar occurrenzas dadens dastgan 100 persunas far part, en il liber èn 300 persunas lubidas. Cun obligatori da seser èsi lubì da consumar insatge. Ils participants e las participantas ston sa registrar cun las datas persunalas. Tar occurrenzas senza public, sco per exempel inscunters d'uniuns, èn 50 persunas lubidas. Era inscunters privats èn lubids cun 50 persunas dadora e 30 persunas dadens.
A partir dal zercladur pon avair lieu occurrenzas da pilot en ils chantuns. Per quellas occurrenzas vala ina limita da 600 persunas dadens e dadora ina da 1'000 persunas. Mintga chantun po realisar tschintg occurrenzas.
Sport e cultura: Bogns ed implants da wellness pon puspè avrir cun limitar il dumber da persunas. I vala 15 meters quadrat spazi per persuna. Sport e cultura po avair lieu en gruppas da 50 persunas. Concurrenzas èn be lubidas dadora. Concerts da chors èn era lubids dadora.
Homeoffice: I vala nagin obligatori da homeoffice per firmas che testeschan regularmain ils collavuraturs e las collavuraturas. Il Cussegl federal recumonda dentant anc adina da far homeoffice.
Scolas: Scolas autas pon puspè far instrucziun da preschientscha senza limitas. La premissa è dentant in concept da testar. L'obligatori da mascras e distanza vala vinavant.