En 33 vischnancas ha l'uffizi federal per ambient intercurì ils satgs da rument. Mintga diesch onns fa quel quai per eruir tge che nus bittain insumma tut davent e co ch'il rument vegn separà.
Rument da chasadas sa reducì
Il rument da las chasadas svizras è sa reducì aifer 10 onns per persuna per 58 sin anc 148 kilos. La raschun per questa reducziun saja surtut che dapli material è vegnì reciclà aifer ils ultims onns. Tuttina saja anc adina in 5avel da tut quai che vegnia bittà en il rument material ch'ins pudess reciclar, uschia il studi.
En tut datti mintg'onn radund 6 milliuns tonnas rument or da chasadas e manaschis pitschens. Quai èn 671 kilos d'uschènumnà rument da citads e vitgs (Siedlungsabfall) per persuna. Circa la mesadad da quest rument vegn rimnada ed utilisada separadamain. L’autra mesadad vegn brischada.
Mesadad dal rument da victualias avess'ins pudì evitar
Malgrà quest svilup positiv, tira il Bafu ina bilantscha mediocra. 21% u 31 kilo rument per persuna avess'ins numnadamain pudì reutilisar. Tenor il Bafu sa tracti spezialmain da restanzas da mangiativas, sco era material sintetic sco buttiglias da latg u da schampo.
Bain è la quantitad da rument da victualias en il satg da rument sa reducida entaifer 10 onns da 60 sin 50 kilos per persuna ed onn. La cumpart da las victualias en il satg da rument è dentant s'augmentada da 15,2% sin 18,4%. Quai haja dentant er da far cun la reducziun d'auter material sco glas, palpiri u materias sinteticas.
