Tenor ina statistica da la federaziun professiunala FMH han gia passa 38% dals medis e da las medias che lavuran en Svizra, fatg lur scolaziun en in auter pajais. E questa dependenza vegnia plitost anc a crescher ils proxims onns. Schebain la Svizra haja en l'avegnir avunda medias e medis dependia cunzunt da las proximas decisiuns politicas – per exempel la nova tariffa Tardoc, scriva la FMH.
Prest dapli medias che medis
Anc in’autra tendenza ha la FMH constatà: Gia prest vegnan las medias ad esser en la maioritad. L’entschatta da quest tschientaner muntava la cumpart da las medias en Svizra anc a 29%. Oz è ella gia creschida sin 45%. Ed actualmain studegian dapli dunnas ch’umens medischina – numnadamain dus terzs.