Il 2018 aveva il parlament decidì in credit da 60 milliuns francs per il transport d'autos cun il tren sin trajects d'impurtanza naziunala. Quest credit è uss vegnì augmentà. Suenter il Cussegl naziunal ha era il Cussegl dals chantuns decidì d'augmentar il credit per 46 milliuns francs. Ils daners èn per il Vereina, il Furca, il Lötschberg e da nov vitiers en la glista vegn il tren d'autos sur il Simplon.
Pliras investiziuns
Dals 46 milliuns dapli survegn la Viafier retica enturn 8-10 milliuns, di il responsabel per las finanzas tar la Retica, Silvio Briccola. Cun quels duain vegnir sanadas las vias avant il tunnel, ma era duain ils daners vegnir duvrads per in nov sistem da cassas mez-automaticas.
Economicamain vai fitg bain cun il Vereina. Dentant tecnicamain datti pliras raubas che nus stuain meglierar u remplazzar.
Dal credit da 60 milliuns ch'era gia vegnì decidì dal 2018 ha la retica survegnì var 20 milliuns. Cun quels han ins investì en ulteriurs vaguns da transport. Era han ins cumprà ina nova locomotiva. Ins planisescha ina uschenumnada gestiun da «sandwich», che prevesa da mintga vart ina locomotiva. Cun quai pon ins agir en cas ch'i arda pli spert.
La pli gronda investiziun è dentant planisada per novs chars da transport. Suenter 25 onns èn quels da remplazzar, di il schef da finanzas Silvio Briccola. Questa investiziun da var 30-35 milliuns francs n‘è dentant betg includa èn il credit da la Confederaziun. Quai è pussaivel perquai ch'il parlament ha decidì da midar il sistem da finanziaziun. Quai pussibilitescha a la viafier retica da survegnir credits per meglras cundiziuns.
Dapli che spetgà
Cura ch'ins ha concepì il tunnel dal Vereina han ins calculà cun in maximum da 400'000 autos l'onn. Questa cifra è dentant gia vegnida cuntanschida il 2006. Ed il Vereina vegn frequentà onn per onn adina pli fitg. L'onn passà hai dà in record da 535'000 autos ch’èn ids tras il tunnel.
Or da l'archiv:
Avant dus onns ha RTR visità il Vereina ed accumpagnà la lavur durant in di:
